2015年10月31日 星期六

英超季初回顧

已有一段時間沒有出新文章,再唔寫返D野恐怕呢度遲早關門大吉。希望大家可多作留言,令小弟有動力繼續寫下去。

現時英超剛好打了十週,不如來一個簡單的回顧吧!

早於季初時,大家心中的奪冠熱門應不離曼城,車路士和阿仙奴3隊,極其量加多一隊曼聯而已,經過十場賽事之後,曼城,阿仙奴及曼聯已穩守於前四位置,但最令人意外是上屆冠軍車路士,排名竟然在屈福特和史篤城之後的十五位,真的眼鏡盡碎。上屆除了是冠軍球隊外,更加是防守最出色球隊之一,今年在並無主力流失的情況下,突然大跌watt, 防守之差更是像一隊護級份子,星级球員如夏薩特及法比加斯等同時失去光芒,好像失去了動力般。現時摩連奴要考慮的問題,不是如何可以喚醒一大班無心戀戰的哥哥仔,而是考慮收到大信封後,拿著三千萬鎊支票去哪裡度假,之後再揾另一支班霸教兩年,奪冠,收大信封,再拿支票度假,不段重覆。
     
另一支是我看好今年可賞冠軍滋味的阿仙奴,季前只收購了施治,前鋒線未有補強,仍可憑穩健防守及主要對手失準下,佔進了榜首位置 ; 但日前有廠迷網友話球隊每年差不多呢段時間就會出現大量傷兵,之後就會是杯賽出局.....似乎魔咒又開始靈驗,球員開始接連受傷,聯賽杯出局,歐聯亦危危乎,倒不如專心於聯賽努力吧!球隊現時前鋒線仍欠一把尖刀,一月份雲加唔該積極D啦!

以人腳來說,曼城一定是英超平均最強的,鬼叫人地老闆有米咩!哼!車仔唔知有無後悔放走奇雲迪布尼,現在强勢回歸加盟最強敵人曼城,令曼城可謂如虎添翼,會是阿仙奴爭標可能唯一的對手。前鋒阿古路必然是英超最強殺手,可惜是容易受傷的男人,不然成就會更高。久缺了阿古路,後備還有之前於史雲斯可獨當一面的射手邦尼,固仍可保持一定攻擊力。傷了施華,仍有拿斯尼,總之有錢真係大X哂,點同佢鬥。

曼聯方面,人氣新兵迪比開始有少少水貨味道,朗尼已信心盡失,前線只靠季初連續幾場入波的馬迪爾和表現最穩定的馬達支撐著,但馬迪爾的蜜月期似乎已過,要努力再進一步了。後防有季初演完鬧劇的迪基亞頂住,可以像施治般為球隊多取约十分左右,不過無論如何,球隊已欠缺費蛇時代那份霸氣,和人所共知的“額外力量",不用講得咁直接,你懂的。

至於愛隊利物浦,不知是羅渣士技窮還是倒霉,雖然季前買入幾名優質新兵,本應人腳比上季增強了不少,但傷兵問題一日比一日嚴重,而球員本身似乎已在羅渣士領導下迷失了方向,落到場不知如何去踢,而且表現出來死氣沉沉,似乎換領隊是解決問題的方法之一,剛巧市場上竟然仍有高普這位能力與魅力均在一般水平之上領隊正在待業,老闆亦把握了這機會將他帶來隊中,意味著新時代的來臨。唯上天似乎想考驗一下高普的能力,看看前鋒線上,一,二,三號前鋒相繼受傷患困擾,剛打起的丹尼京斯更嚴重受傷,好可能下季見,現只餘下疑似水貨奥力治支撐入球,可以想像欠運的程度。在一月轉會窗開啟動前,唯有用現有人腳在踢法上動腦筋。眾所週知,高普向來以前場高壓踢法聞名,可以想像利物浦將以這踢法為主,減少個人主意,最直接受影響的肯定是古天奴,其個人化踢法已開始令我生厭,可能部分利迷都會有同感,季初幾場經常禁區外浪射,而且把握力可能比我還要低(講笑),經統計顯示,他今季的51次射門,只有一個入球,不如安份守己,做多一些美妙傳送,最後一脚盡量交回前鋒做吧!另一個要批評的是安尼簡, 因本人十分睇好此子可成材,所以對他的要求更嚴格。高普上場後,安尼簡终可回到他最喜歡的中場位置,如繼續進步,可能是下一個波歷克,唯近幾場見他經常低下頭帶着波死衝攔衝,對手已經兩三人包夾仍不找隊友幫手,最後當然俾人搶走腳下球。他有身型優勢,護球能力不俗,但雙拳始終難敵四手甚至六手,高普要好好指點一下。另外,在高普領導下踢了四場波,除了踢法上有改變外,整隊波的精神面貌亦提升了一個層次,明顯地多了一份朝氣,而且他在場邊不停地鼓勵球員,入波時亦高調地慶祝,亦可為了球隊帶來正能量,希望一月份可憑其個人魅力,吸引到一兩位有份量球員加盟,令我們可向來前四個沖擊一下。

講起愛隊就停唔到口,餘下要提的,必然是沒有最神奇,只有更神奇的韋斯咸。在季初,作客擊敗了阿仙奴,之後主場接連輸俾另一神奇球隊李輸十成和升班馬般茅,一度以為赢阿仙奴只是偶然的事; 但之後一場又作客大炒季初三場零失球的利物浦,之後主場赢紐卡素,再在作客情況下擊敗季初如狼似虎的曼城,服未?未算,跟著又接連失分俾下游份子洛域治和新特蘭,都未服?  再低季初表現不俗的水晶宫和失色冠軍車路士,R爆頭!我真係唔識得解釋,睇了幾場韋斯咸賽事,覺得其攻守轉換速度極快,主要發動機係上季法甲助攻王皮耶,此子個人技術了得,視野十分廣闊,射門亦有高水平,韋斯咸真是執到寶。看看球隊會否一直神奇到季尾,本週對升班馬屈福特,是否又繼續鋤強扶弱?今晚便可知曉。

太長篇大論了,餘下球隊有機會再講吧!

103 則留言:

  1. 信徒兄,利記反先2:1呀!!

    回覆刪除
    回覆
    1. 唉,無言,希望油王唔好炒領隊

      刪除
    2. 其實Oscar, William, Kurt Zouma 等都踢得有heart, 係2或3個球員未番嚟。34歳泰利直頭慢咗半拍。我諗好多車迷唔想炒摩連奴,因為大家都認為佢係車仔歷史上同現在市場上最好既領隊。大佬,佢要買賓歷基就只得法亞哥,要Stone 就只得2件蛋散,要人煮魚翅,但又只供粉絲,識變魔術咩!

      刪除
    3. 只有阿仙奴做車仔送分童子

      刪除
    4. 韋利安其實真係打得好,作為利記粉絲,我一路睇場波,其實只係驚佢一個

      刪除
    5. 車仔的信心士氣真是低無可低,難度要等到聖誕快車期才能窮則變、變則通?

      刪除
  2. Boring boring Man United, boring boring Man United !!

    回覆刪除
  3. 把最有射門能力既馬迪爾靠邊站,把態沉既朗尼置中...雲高爾的用人同佢既"philosophy"一樣咁勁!

    回覆刪除
    回覆
    1. 似乎一月份雲帥又要大手出擊,朗尼可以certified, 唔買返個重量級射手,可能要同利物浦爭前四

      刪除
    2. 就算好彩買到一個射手, 唔改變淨係控球唔射門的哲學都冇用

      刪除
    3. 哈哈...睇黎雲高爾的所謂"philosophy"就係"控球唔射門"...我地真係識條鐵咩!

      好懷念當年費Sir的進攻足球,好有娛樂性。依家...好似昨晚咁...BBC網上(帶諷刺地)提到:曼聯上半場有一個射門啊....真係悲涼!

      刪除
    4. Depay 應該生活紀律有D問題,可能入錯貨。如果費Sir 2季前真是賣朗尼俾車仔就慘了!我都懷念以前費Sir既曼聯,仲記得當年親身去睇曼聯對住無記錯係有麥阿里士打既高雲地利。最深印象係試過舒米高接住射門,之後隨即邊見傑斯同碧咸左右2邊高速快放,一路舒米高跑出2步用手拋波過半場俾其中一個策動反擊......精彩!

      刪除
    5. 舒米高用手掟球的能力真係古今第一!

      刪除
  4. 其實曼聯今季仲有一個史摩寧值得注視, 除左迪基亞之外佢今季大部分時間都表現平穩, 已經係後防另一個不可或缺的球員
    中前場反而希望Jesse Lingard同Andreas Pereira有多啲機會, 前者今季幾場後備入黎踢得算唔錯

    回覆刪除
  5. 還好今屆Andreas Pereira resigned with Man U.

    多年前Pogba因費Sir俾唔夠機會佢,而以自由身轉投祖記而恨錯難翻。
    果時Pogba雖然上陣機會唔多,但表現都好搶鏡。當時真係好希望曼聯真係可以挽留到佢...可惜!

    回覆刪除
  6. 曼聯的問題是在於季初引入的攻擊球員會否比送走(尹佩、小豆、贊奴)好,現在只能苦了孤掌難鳴的馬達,及寄望新秀們能極速成長。

    回覆刪除
    回覆
    1. 果個Depay得一場波踢得好....唔知佢既人工可唔可以de-pay呢?

      刪除
    2. 迪比之前講到救星一樣,又話罰球可拍得住碧咸,而家可能中伏了

      刪除
  7. 古天奴無咁獨啦, 成隊都唔同左!

    輸緊粒都仲係有火.

    高普有料到!

    (講起愛隊就停唔到口 mode)

    回覆刪除
    回覆
    1. 有時就係咁奇怪,唸住對D經常入唔到波既雞隊,佢就突然變身入你幾球。今次鬧完古天奴成日浪射,今場就打出今季代表作而且梅開二度,服未。
      講起服,韋斯咸對升班馬又輸2粒,服哂!

      刪除
    2. 服李斯特同華弟多d
      再一次反cup

      刪除
  8. YouTube 貧道關於 車v利 既分析
    https://youtu.be/hzv84QIyQII

    回覆刪除
    回覆
    1. 很詳細,謝謝!我改名撐愛隊!車仔昨日有馬迪,Oscar 同Williams 之後中場好似好咗。有人話最緊要係冇咗Hazard!佢上場assist, 冇射門冇create chance 好似冇踢一樣,希望只係心態未得啦!

      刪除
  9. 回覆
    1. 隨便發言,講粗口都得,哈哈!

      刪除
  10. 有冇人睇緊曼聯場波?估唔到Smalling 今年進步咁大,幾年前以為費Sir入錯貨,仲衰過Jones。依家覺得一千萬鎊轉會費好抵

    回覆刪除
    回覆
    1. 作者已經移除這則留言。

      刪除
    2. 屎摩寧真係好大進步,頭兩年都覺得佢唔多掂,同菲爾鍾斯一齊出道,又講到幾有前途咁,覺得佢兩個都係得嗒笑,估唔到屎摩而家進步到拍得住全盛時期既泰利。

      刪除
    3. 雖然好多人對LVG的possession football有意見,但不得不讚今屆曼聯的後防表現。差不多的人腳,但結果卻天與地,同史摩寧的進步有莫大的關係。

      刪除
  11. 唉,尋日等咁耐又係見証住車仔輸波!不過隊波真係踼得越來越好。尋晚Hazard都生番D,成班球員係想有攞成績,而且成場有廿次射門,三日前打完歐聯算交足功課。可惜又係一次後防小錯俾人幸運入波。相反,車仔就不幸地有射門撞柱,堅十二碼不獲判等,有時黑起上嚟真係接2連3。另外我比較奇怪點解七十分鐘之後先出Remy, 好明顯,佢出嚟之後就有好多機會成功突破對手後防,上季佢已經好多次後備上陣而有入球,希望之後多D派佢上陣。

    回覆刪除
    回覆
    1. 其實雷米絕對不是後備料,每次出場都交足功課,如果長期有正選,肯定是15+入球的球員

      刪除
    2. 咪就係,話晒都係法國國腳,都唔明點解成日坐冷板凳。若果當年利記執咗佢,肯定好過巴神啦。唯一好消息就是油王今次好有耐性,繼續支持摩連奴。

      我冇睇尋日利記場波,究竟輸乜呢?不過今年水晶宮同韋斯咸真係勁!

      刪除
    3. 作者已經移除這則留言。

      刪除
    4. 利記輸把握力差,連呢方面一向不俗的賓迪基都錯失了幾個機會,尤其是下半場有一球門前無人看管竟然頂高,以賓基的水準計絕對不及格,如果入左結局就不一樣了,可能整定近年對親自水晶宮都出事。

      刪除
  12. 買車仔最後取得歐聯資格是否值搏
    :D

    回覆刪除
  13. Yes 又過一關,下星期香港對中國好睇了

    回覆刪除
    回覆
    1. 港隊對馬夫都一度俾人狂攻,而今日中國赢一打,希望奇蹟再一次出現

      刪除
    2. 只希望香港憑拚勁打場好波

      刪除
    3. 希望中國淆港隊既外國人,對抗性應該足夠。

      刪除
    4. 半場黎講入籍球員既身體對抗同爭搶相當有作用

      爭波同落腳岩岩好

      刪除
  14. 我認為港足現時不單只要以出線為目標,更是有顆要維持球圈士氣嘅士命感,所以若今天不幸先失,也應不會像以往般兵敗如山、無心戀戰。

    雖說要出線今仗是非勝不可,更往論守和或落敗,但從來勝負只是從哪方面看,單是現時這種氣氛,港隊在短線的未來,已是坐和望贏。今晚8點

    回覆刪除
    回覆
    1. 蘋果做東亞運冠軍隊個報導真係令人唏噓

      刪除
    2. 有老友在group chat話香港隊不值得開心,但我認為有一秒秒睇足最近3場港隊直播嘅朋友,心裡或許會和我一樣出現兩字 - "感動",這就是歸屬感,這就是我們應該團結的香港。

      還記得當年對中國輸7球呀
      (當然,中國人足球也退步了不少)

      刪除
    3. 朋友說不值得開心的原因?大概是前峰控唔到波,無体能,無得出線,和左好似贏世界杯之如此類咁....

      刪除
  15. 在茶記睇香港v中國

    撐港隊

    回覆刪除
    回覆
    1. 其實真係幾感動的!

      其實港隊和中國,仲有無機會出線?

      刪除
    2. 機會甚低

      【on.cc東網專訊】根據國際足協賽制,現時世界盃亞洲區外圍賽第2圈,8支小組首名及4支成績最佳小組第二名,直接出線第3圈外圍賽。

      今仗和波後,香港及中國同時失分,雖然香港仍以3分壓住中國排於小組第二名,尚餘一仗於明年3月作客卡塔爾。國足則仍有2戰,包括主場對馬爾代夫及卡塔爾兩場,香港由於得失球差遠遠落後中國,要爭取小組第二名,形勢上比較被動,除了下仗需全力爭勝,還要寄望中國餘下兩仗失分,才可以保住小組次名。

      不過,即使香港最終能以小組第二名完成賽事,仍未代表可以殺入世盃外第3圈,因為還要和其餘七組的第二名比較成績,比較時又要減去小組排包尾隊伍(很大機會是不丹)兩場的戰果才計算,情況較為複雜,但暫時香港得失球比其他組別隊伍差,稍落下風。

      國足雖在上仗大炒不丹12蛋,如上文所述,由於計算最佳次名要減去對小組包尾隊伍(很大機會是不丹)的成績,經計算後國足與港足球差同為+2,與其他組別競爭對手相比處下風,既要在餘下比賽贏波兼爭取入球,同時寄望其他小組對手失分。這場和局,港中可說是「攬炒」!

      除世界盃外圍賽,今次賽事也連繫到2019年亞洲盃的前景。8支小組首名及4支最佳小組次名,將可直接出線決賽周,餘下16支最高排名球隊,則需透過2017年展開的第3圈分組賽爭奪出線席位。

      刪除
    3. 由頭到尾,香港人都無好大期望可以出線, 當然出到就最好啦
      香港人最希望就係可以睇到有拼勁, 有打不死既精神, 港足真係頹得太耐啦...
      希望本土球員生性, 唔好以為自己真係球星

      冰島得, 香港一樣都得!!!!!!!!!!!!

      刪除
    4. 其實出線只是數字遊戲,實際情況大家都知,球員更加清楚,只係希望憑著今次難得一見既熱潮,能令政府部門更加關注本港足球發展,令球員們可以揾到食,才可一步一步帶起本地足球,有好波,自然有人入場睇,80年代足球其實幾好睇,同而家相差甚遠,希望不久將來可重現當年盛况

      刪除
  16. From BBC website.....
    Manchester United have got a reputation as a side which is more effective than exciting under manager Louis Van Gaal, with ex-Red Devil Paul Scholes one of the biggest critics of the style - or lack of it - from the current class from Old Trafford.

    "biggest critics of the style - or lack of it" 真係金句!

    回覆刪除
  17. 講真宜家嘅香港隊及中國隊都比八九十年代差一班波

    回覆刪除
  18. 講真宜家嘅香港隊及中國隊都比八九十年代差一班波

    回覆刪除
  19. 紅軍自從高普接手後,精神面貌的確唔同左,季初幾場真係可以話死氣沉沉,縱使赢波都無啲朝氣; 但同一班球員俾高普執左幾場,而家個個生龍活虎,同你搏命咁款,當然仲係有不足之處,好似主攻能力仍然唔夠強,只靠打快速反擊得分,對弱隊可能老鼠拉龜,希望高普可以慢慢調教,學佢話齋,要對手怕左我地,好似衝冠失敗嗰年就做到呢樣野

    回覆刪除
    回覆
    1. 而家既FORM係我自肥賓以後無見過...我暫時黎講開心啦

      刪除
    2. 如果我係利迷我都會覺得興奮。場波太夜踢我剩係睇咗小小....一個字:爽!而且收起賓歷基改用靈活前鋒既戰術又啱晒,冇咗Kompany等2大中堅既曼城梗係頂唔住啦。估唔到高普比想像中仲有驚喜,恭喜恭喜!

      車仔既Hazard終於都醒啦,希望下場對熱刺打番場好波啦。

      Joe

      刪除
    3. Joe 兄改左名喬?haha, 我仲以為有新朋友加入添

      刪除
    4. 哈哈信徒兄正是,近來乜都轉,喬是Joe既中文。隊車仔如果再輸幾場可能會再改成'贏'架啦.....

      刪除
    5. 今晚睇好車仔可以打返場好波輕勝

      刪除
    6. 應該係但今季好難咁肯定,4點起身睇睇先。

      刪除
    7. 喬兄,4隻蛋應該收貨啦!
      睇韋利安D罰球又唔覺得佢係嗰隻罰球專家,
      但又經常入波或者製造大威脅埋門,好野好野!

      刪除
    8. 當然收貨啦信徒兄,其實最關鍵係前車仔球員張紅牌。不過之前車仔都佔上風,最緊要成隊波打番起。唯一美中不足係Diego Costa D禁區內接應傳波既走位好差,希望離緊對熱刺會改善番。

      刪除
    9. 作者已經移除這則留言。

      刪除
    10. 對熱刺暫時睇55波,一隊有主場之利,近況亦勇; 另一隊質素較佳,但久沉初起,應該幾好睇。
      另外大家唔好忘記今個星期榜首大戰李斯特城vs曼聯,呢個星期開始李城接連硬碰多隊強隊,是時候見到真章了。

      刪除
    11. 希望對熱刺Hazard繼續有料到而Costa番埋嚟就正啦!
      信徒兄,你估利記之後𠴱場又會數史雲司幾多粒呢?而淪為笑柄既米奴列又可以捱多幾多場呢?@-@

      刪除
    12. 哈哈!我估對史雲斯可能只能小勝一球,班波始終都係飄忽不定。米佬真係對佢又愛又恨,以救波反應來說可以話達到一線門將水平,但你又唔知佢幾時出事,作為職業門將,竟然喺禁區拎住個波廿九幾秒都唔放出來,球証已經算係咁,俾足機會佢,有乜可能會犯D咁低能既錯誤,都仲未計佢禁區邊頭鎚解圍俾人射空門個球,我認為保丹絕對值得俾機會佢試一試,其實佢每次出埸都表現得好有自信,我地對佢既信心唔會比米佬差。

      刪除
    13. 我估利記會數2粒。米佬之前話自己上季比賽時成日諗嘢諗得太多,我估又係咁掛。比賽時做乜諗嘢呢?如果再間唔中有呢D低級錯誤,對隊友信心都有影響。之前佢做比利時第二門將已經好唔鍾意,如果再坐冷版,佢一定要求轉會。

      刪除
  20. 阿仙奴再現黑色十一月同傷兵潮

    高鈞賢暫時要抖兩個月

    回覆刪除
  21. 華弟輕鬆創造英超入球紀錄

    回覆刪除
    回覆
    1. 華弟速度真係超快,成日覺得呢類球員好多時都係一季貨仔,李城死亡旅程剛開始,睇下會唔會去返其應有位置啦!

      刪除
    2. 佢真係快得緊要,是現時英軍欠逢的

      刪除
  22. 唉,唔通佢想走?
    https://m.youtube.com/watch?v=wNzX85feYV8

    回覆刪除
  23. 真係一時高潮、一時低潮,曾經時隔十九幾個月上了榜首的兵工,宜家又四面楚歌,不知這個低潮期要唯持多久,與那邊箱當日死氣沈沈、然後否極泰來,剛剛大勝打入杯賽四強嘅利記相比,真係形成好大對比。

    教授,你要到幾時才學懂足球是打成季的?

    回覆刪除
    回覆
    1. 印象中兵工廠聖誕前後散咗乜唔係常態咩?之前試過好似2次聖誕榜首又帶出架,不過最後都唔得。雲加要學費Sir讓下馬就差唔多,費Sir操班波既狀態真是有一手,成日紅魔鬼聖誕後D狀態就提昇

      Joe

      刪除
    2. 今晚無山神同蝦鬚拿,又要留力打歐聯,難攪。

      刪除
    3. 無錯,當年現在也是如是,所以曆史不斷重演,並不是偶然。

      而之所以費sir能成為絕大部分球迷心中的殿堂級,包括當年討厭紅魔的我。今晚LVG帶的曼聯又失分,看他的運氣能延續多久。

      兵工付6拿了3分,靠的只是個別球員,懂波的都應該猜到週中要作客淨勝兩球,談何容易~~ 要踢歐霸也不是什麼壞事,只怕下一位打柴的球員會是尚餘表演亮麗的大眼。

      刪除
    4. 車仔主場又輸波,對手仲要係降班熱門份子,真係想考驗油王忍耐力?

      刪除
    5. 睇到81分鐘真是冇眼睇,可能車仔似降班熱門多D。2場擺Harzard做前鋒真是唔得入唔到波。費比仔,幾時返嚟呀?

      刪除
    6. 尋晚阿仙奴唔輸都偷笑啦
      仲夾到三分返黎

      刪除
    7. 如果我係兵工廠迷就直情多謝油王啦!今晚應該一齊歐聯晉級,yeah

      刪除
    8. 尚可保住英格蘭球隊排名同積分

      刪除
    9. 身為利迷,都要恭喜車迷同廠迷,亦要多謝兩支球隊為英隊保住席位,仲以為得曼城一隊過關咁大獲添

      刪除
  24. 利記始終走唔甩飄忽既風格,突然又大幅失準,同週中比好似另一隊波咁,仲以為依C執添,都係高普最清醒,叫大家唔好當利記係爭標分子,目標始終都只係前四。

    回覆刪除
  25. 股市死氣沈沈,最近又比該死的新股所害,但柳暗花明,會不會像兵工一樣來過估你唔到的反彈?

    回覆刪除
    回覆
    1. 兵工廠係歐聯
      踢一踢先郁一郁,對高班馬只能搏偷雞

      刪除
  26. 16週D1
    從歐賽戰線回歸聯賽

    - 關注bonnie茅夫對曼聯,能否打落水狗?
    - 榜首新貴lazy duck 同車仔。牌面車仔竟然係underdog, 而李斯特未來一個月即將對碰中上游列強,強勢及一哥位置維持至何時?
    - 阿仙奴對av, 應該全世界一面倒睇好前者,周中歐聯游刃有餘。人員輪換及調配將極影響聖誕快車走勢。
    - 利v西,依舊缺屎到。但三分應該手到拿來。
    - 熱v紐,西咸v城篤,相信是五五波。

    以上。

    回覆刪除
    回覆
    1. 轉工已經鬼咁唔得閒,咁早起身都唔知為乜,又見証車仔輸波!對面李斯特城馬敵斯真係好fit. 雲尼亞里真是好惦,當年唔係佢車仔都攞唔到第四有得踢歐聯而吸引油王入主。亦多謝佢買林伯,杜奧巴,施治,洛賓亦帶起新仔泰利!

      刪除
    2. 應該係買林伯,格連莊臣同走前建議買施治,杜奥巴同洛賓。何輝真是講波講得好,好專業又有獨特見解。如果唔係要我聽李榮基既話我實轉英文。

      刪除
    3. 睇到車仔踢成咁,好難想像當中大部分係上年冠軍功臣。班波踢來慢條斯理,搓來搓去唔知想點,好似上半場補時階段落後緊一球,D球員淡定到好似領先兩球咁,完全莫視最後一擊既機會,唔輸就有鬼,莫講話前四,而家同尾三只有一分差距,祝好運!

      刪除
    4. 另外又要再講多一次,一個好使好用的雷米經常放在後備席,真係好浪費,每次出場都有貨交,反而今季打人多過入波既哥斯達依然經常正選,令人摸不著頭腦。如果上年利物浦簽左佢你話幾好,對利記同球員本身都雙赢。

      刪除
    5. 信徒兄,簽得到未必好呀,DC難登大雅之堂。

      Joe兄,我都是較喜歡何輝講波,加埋丁傑乃是不錯組合,只可惜要周末以外時間才能聽到他們。

      現時李城節奏真的很快,值得排第二,希望他們能捱過快車期,繼續保持勇態在前列位置。

      刪除
    6. Mj兄,我唔係話DC,
      我話如果簽到雷米就好,
      利記多左個高效射手,
      而佢本人亦大把正選機會,雙赢,
      而家白人工,佢仲當喺打之齡,
      相信佢唔係想咁的

      刪除
  27. 真特 vs 禾夫斯堡
    羅馬 vs 皇家馬德里
    巴黎聖日耳門 vs 車路士
    阿仙奴 vs 巴塞隆拿
    祖雲達斯 vs 拜仁慕尼黑
    燕豪芬 vs 馬德里體育會
    賓菲加 vs 辛尼特
    基輔戴拿模 vs 曼城

    回覆刪除
    回覆
    1. 你隊阿仙奴好似跌左落無間地獄一樣,每年劇情都相同,傷病問題一樣,歐聯命運一樣,亦年年有前四,幾時可以走出去。

      刪除
    2. 其實次名都係死籌多,預左
      千祈唔好打甩脾
      疊埋心水爭聯賽

      刪除
  28. 好想睇恆大對巴塞,可否數十粒。 =D

    回覆刪除
    回覆
    1. 點係呀,即刻過來撑場,
      即刻動筆寫篇野來答謝支持先

      刪除
    2. 同埋你講邊隊數據十粒先,巴塞未必會認真喎

      刪除
    3. 咁又係,好只係想睇下美斯扭過鄭智,美斯都可能臨完場先出來打個招呼。

      刪除
    4. 我就想睇阿蘇扮狗咬Q佢

      刪除