2015年9月1日 星期二

轉會情況

本週為國際賽日子,抽空講下今年的轉會窗。  

小弟因較少睇其它聯賽,所以我集中講下英超球隊轉會情況,其它的交由大家發表吧!

由於本年度英超轉播費用繼續大幅上升,得益的就是所有英超球會,大家都會發現今年一些下游球會在買人方面都較以往大手筆,動不動都有過千萬鎊的交易,一些小型球會怎至投入超過三千萬鎊去增兵,令賽事激烈程度較過往更高,所謂護級球隊也隨時可咬死大老虎,經過四週賽事,傳統5大球隊根本未見有壓倒性優勢。

首先,在今年買人方面花了超過1.5億鎊的曼城,成績暫時亦是最好的,買入的包括史達寧,戴爾夫,奥達文迪及奇雲迪布尼,都各具份量,中前場已接近完美,唯一挑剔可能是前鋒位置,因為容易受傷的阿古路,只有邦尼可以頂替,在多線發展下略有不足。後防方面,右閘蕯巴列達跟沙格拿已不算年輕,要開始尋找接班人; 左邊的卡華洛夫跟基歷治,以班霸級球隊來說級數不算高,因此一月份可著手買後防球員。
車路士方面,本身人腳已相當不俗,只有後防有補强必要,泰利已37歲,伊雲奴域今季亦見老態,由於愛華頓對史東斯叫價太高,車仔不想做老襯,只好另覓替補,艾度巴巴自己不熟悉,由大家評論吧!比高域絕對是一位很好的後備門将。中前場買入的柏度,確令曼聯咬牙切齒,一來到立即有好表現,應是質素超群,跟夏蕯特可左右呼應,支援單箭頭哥斯達。前鋒除了哥斯達,還有法卡奧及雷米做替補,打單箭頭應足夠了。

至於曼聯,再一次雷聲大雨點小,相信是費蛇同雲高爾的分別,上季荷甲神射手迪比,仍未在英超證明實力,舒尼達連和達米安則相當對辦,令防守力大增,還有小豬,可跟卡域克互相替補,令中路有足夠球員作多線發展。門將羅美路算是不俗,只是未去到迪基亞的級數。唯前鋒位置則未有大牌球星來投,朗尼表現大不如前,小豆已走,小將占士威爾遜未夠條件擔大旗,在買不到人的情況下,雲帥早前已表明會將費蘭尼推前打前鋒,對於資金充裕的曼聯,仍買不到頂級射手,可見其吸引力已大不如前。

阿仙奴又如何?球會在資金方面已明顯比早幾年鬆動,但雲加一向精打細算,心儀前鋒一直都是賓斯馬,唯皇馬似乎未有意思放售,而早前傳出的卡雲尼,相信機會亦不大,暫時只有施治一名新兵,但已可保住後防,減少失球,中場已有人滿之患,無必要再買人,前鋒基奧特及格而不突出,一月份又要再努力揾前鋒了。

輪到愛隊利物浦,哈哈!當然會講得詳盡啲。球會今年再買入一大班球員,而且在轉會窗初期已差不多完成大部分收購,令新球員可盡快溶入球隊。門將保丹在上季其仍在保顿時,面對利物浦表現如有神助,令羅渣士印象深刻,現今免費來投,可為米奴列帶來挑戰。後防補充了右閘佳尼,上季在修頓已表現出是英超其中一位最佳右閘,今季所見未有走樣。左閘高美斯應是一大驚喜,以350萬鎊由查爾顿購入,本以為又要借出去吸收經驗,誰知季前賽表現有板有眼,開季更直接進入正選陣容,完全不似一個十七,八歲的小伙子,假以時日必成大器。中場方面,占士米拿亦是免費來投,此子跟隊長一樣有用不完的氣力,不時助攻助守,實而不華,任何領隊都不會介意擁有這樣的球員。法明奴肯定是有質素,唯似乎未在最佳狀態,暫未證明接近三千萬鎊身價。前鋒丹尼京斯相信是波連尼的加強版,希望領隊可多給機會,其不停走動和難打性格相信可幫助球隊拉空對手,讓其它攻擊球員有機可承。賓迪基在兩球會經過慢長拉鋸後,終以超過三千萬鎊加盟,之前大部分球迷都認為太贵,因認為其踢法跟羅渣士格格不入,之前失敗例子已有卡路爾,林柭及巴神。唯賓迪基其實並不是柱式中鋒,除頭鎚非常了得外,亦有一定腳法,跟隊友配合亦不俗,看來今次無入錯貨了。還有上年已購入而借給里爾的奧歷治,上年曾有一定期望,可惜經過上年於法甲被選為表現最差十一人之一後,今年回歸見其信心盡失,現在是球隊鋒線第四選擇,可能聯賽杯才有出場機會了。

至於其它球隊,熱刺今年未見活躍,在臨關轉會窗前以約二千二百萬鎊簽入的孫興民,於德甲持續有表現,看看能否重新激活Kane了,其餘球會不詳談了,大家有興趣可自行發表。現距離轉會窗完結還有數小時,看看最後一刻有否驚天動地的消息吧!尤其是曼聯及阿仙奴迷要多加留意了,可能瞓醒覺就有好消息呢!

55 則留言:

  1. Yeah 支持。作為車迷要提供番泰利只是34歲(80年12月),若果好似以前兵工廠既阿當斯咁都應該仲可以踢多2年。最新車仔又話買多個後衞中堅,係Reading 既Michael Hector, 買完會借番俾雷丁。此子今年年頭先為雷丁披甲,之前四年外借出去踼過四五隊波,啱晒車仔!

    回覆刪除
    回覆
    1. 我有時覺得車仔似炒賣球員多D,
      買入一大班未上位年輕人,全部借返哂出去,
      到有人想要就賣出去賺錢,其實呢個政策幾成功,不過要有條大水喉射住先可以,
      一季借出幾十個球員真係唔簡單

      刪除
    2. 車仔買人都幾特別, 估唔到買唔到石頭仔會走去買Papy Djilobodji (26歲)
      一個唔似車仔或摩佬會買既,一黎唔出名,二黎唔後生,勝在唔貴...

      West Ham 同維拉最後階段係咁買人
      West Ham 買埋SONG 就更加齊腳, 今年唔可以睇少
      Villa 縱使買左好多人,但舒活既戰術同用人同羅渣士有得揮....無左BENTEKE入左個Gestede 頂, 質素爭幾多, 只得個高字...技術粗糙

      刪除
    3. 個市幾悶,高不成低不就,set既買賣少交收.....車仔就係因為佢唔貴所以搵佢頂住先,之後仲可以再搵石頭嘛。其實車仔呢個買人外借方式可以搵錢,見之前賣出2件比利時兵搵唔少,而且現在龍門都係外面踢得好再番嚟。但有時見到如Ryan Bertrand, Oriol Romeu, 甚至乎有新一代沙維之稱既本土McEachran 也最終被賣時,就覺得可惜,希望新借俾雷丁既Pizon同借去水晶宮既賓福特今季踢好D,下季有望歸隊啦。

      刪除
    4. McEachran <--- 想當年佢跟車仔黎香港踢, 控制晒成個中場,仲以為佢掂啦...點知都係唔得

      Bertrand 利記曾幾何時都想買, 但唔啱價,上年係SOUTHAMPTON唔錯喎..
      我睇賓福特就一般料子,未必可以返到車仔

      刪除
    5. 後生,傳送控制夠火喉,仲好過之前另一青訓產品Morris啦。我都有現場睇呀,11年啫,之後估唔到咁快炒領隊又攞埋歐冠,神奇!希望有啲後生可以上位啦!依家最有機會反而係Ruben Loftus-cheek,其他既有Ake, Baker 同Piazon 等。如果Ruben 同Baker打到上去就正。
      咦,ST你都好熟車仔喎!

      刪除
    6. Joe兄果然好熟車仔,
      你講嗰D牛奶咀我好多都未聽過個名

      刪除
    7. Joe兄,以前有打FM, 所以識好多球員, 好多所謂既PROMISING STAR都知呀
      車仔最近買果個巴西仔Kenedy 反而可能有機會打起

      最熟始終都係由MCMANAMAN 時代的Liverpool....亦都因為佢我先鐘意利記

      刪除
    8. 個巴西後生仔係上到位,而且入埋車仔歐冠名單,不過最衰佢唔係青訓產品兼土生土長,佢19歲所以亦冇機會入到Home grown player quota.

      咦,科拿兼麥馬時期當然吸引!麥馬拿文由後場一路推進又一個避五個再入波嗰隻嘛!9x年我都迷FM 㗎。

      刪除
    9. 其實song真抵買,都唔明四大唔斟他

      刪除
    10. 好多球迷都想自己隊波簽Song,
      包括我都好想佢黎利記,
      但幾隊强隊都已有比佢更好的防中,
      阿仙奴又唔會等佢老左幾年買返轉頭啦,
      只有利記有呢個需要,可惜都去返鄉鎚仔踢

      刪除
  2. 雲膠耳咁樣對VV,吓怕好多顶级球星,今年至好只得第三,咁下年就有机会等到高普或哥迪奥拿,—個曼联迷的卑微心願

    回覆刪除
    回覆
    1. 不看好云帥本季能帶領魔隊奪任何冠軍

      刪除
    2. 俳佪3~6名之间,係魔迷都睇到肥朗同门將唔掂,係领隊自我感觉良好,冇計

      刪除
    3. 上季拎第四認真夠運,尤其對紐記楊格最後典勝一球乃成轉淚點,看看"新亨利"能否為球隊擊活下前線,good luck to them。

      刪除
    4. 新亨利将来掂唔惦就唔知,不过咀賤既英国佬説得好,阿古路既身價,韋碧克的入球率

      刪除
    5. 無論如何,以36M買一個初起階段,
      而未證明太多的小將,點都係太搏,
      可以看得出曼聯在轉會窗的無助

      刪除
    6. 非常認同信徒兄,36m買—個新亨利,太冒險

      刪除
  3. 信徒兄,好詳盡的報導,讚!
    今季中游球隊實力不俗,水晶、史雲、史篤加上愛華、修咸及頂尖中游熱刺,相信聖誕快車前,形勢會幾緊湊。

    Btw, 作為愛港愛國嘅球迷,呼籲下聽晚ard七點J2有中港大戰。

    回覆刪除
    回覆
    1. 只要有人睇,睇得過癮,
      我花幾多時間寫都值得。

      明晚上中港大戰,坦白講,
      次次上去踢波,人地都12個打11個,
      想唔輸真係要超超超水準先得,
      估波膽,3:1 啦!

      刪除
    2. 不論你覺得香港足球有多垃圾,不論你有幾愛看高水準足球,不論你關心如否,今晚看到的是香港球員的努力,I am proud of them!

      刪除
    3. 葉雄辉反应幾快,起码只計呢瓣,肯定好过羅美路

      刪除
    4. 最佳球員一定是守門員。

      刪除
    5. 哈哈,baggio兄,唔好抽羅美路水啦,唔係我都會忍唔住講禾確特架喇。

      最佳球員我會選高梵。

      刪除
    6. 冇抽水意图,不过曼联輸第2球,正常d既龍都守到

      刪除
    7. 收晒貨!人哋高一班波兼主場都和到,除咗鬥志可嘉之外,當然唔少得運氣。高梵都真係快過人哋,有啲威脅性。而龍門葉鴻輝都救咗幾個險球,應該係和波最大功臣。

      刪除
    8. 和左真係唔錯
      不過香港球員會唔會瘦左D ....好似無肌肉咁..
      現今足球無體能同肌肉好難會踢得好...

      今場,如果一開波將法圖斯推上中場抽起羅振邦, 後防陳偉豪拍基藍馬會唔會好D? 中場可能唔會踢得咁辛苦
      下場對Qatar 應該會仲難踢, 因為Qatar 行軍偏快, 兩閘受壓會更大

      刪除
    9. 羅邦算踢得唔錯,不過體格呢樣野就真係無辦法。其實kim sir自上場做教練,對抗性都改善左唔少,最緊要夠熱血鬥志,自從而故教練黎新祥同當年郭家明後,港隊球員應該好耐無呢股heart。

      至於下場養尊15:0嘅Qatar對我地體力用足120%嘅港隊,真係要考考kim sir點輪換,西亞球隊仲難踢,不過good luck HK team!

      刪除
  4. dear wai gor

    La Liga 水準高又好睇ar , 西維爾,華西,馬體會都好唔錯,用Now 既自選服務就睇到,唔駛睇直播咁夜

    英超今季曼城最對板,曼聯最攪笑

    回覆刪除
    回覆
    1. 西甲應該好睇,但多在半夜踢,
      睇重温好多時又知道賽果唔想睇,
      所以英超係首選

      刪除
  5. 有冇人有睇香港對中國呀?:)

    回覆刪除
    回覆
    1. 錄影了,睇下有無時間重温,
      不過知道0:0 就興趣大減

      刪除
    2. 唔覺悶
      場波夠晒熱血

      絕住係鍊住春袋到完場

      刪除
    3. 認同樓上
      勁熱血
      雖然無咩絕地反擊場面
      但都好好睇

      刪除
    4. 埸波都係攻防战,港隊有運,中國隊踢得都唔差,不過始終都係無—個能改變局面的球員。有時真唔明,中國咁大都出唔到一個類似中田英壽這類球頁

      刪除
    5. 人民質素既分野,唔關能力事,
      係心態,個個踢到幾腳好波,
      就以為自己係球皇,
      揾到錢,仲同你日操夜操咩,
      落club跳舞玩女啦!

      刪除
    6. 下半場玩9981斬
      易守過上半場
      正傻仔

      刪除
  6. 今週國際賽期
    可以休息下

    回覆刪除
  7. 國際賽期無英超睇真係好悶啊 左閘高美斯防守能力好出色 但係進攻時只能用右腳 已慢慢比對手睇透 我覺得始終不是最佳選擇

    回覆刪除
  8. 好在熱刺都買番個南韓仔孫興文,此子入球能力不錯,係德甲已獲得認同,唔知來到英超得唔得。講真都係要睇熱刺中場輸唔輸送波比前鋒就真

    回覆刪除
  9. 回覆
    1. 荷蘭真係青黃不接, 睇晒成場仲要靠兩個老將頂住...
      左面廸比可能真係當左自己係巨星, 跑動極少, 過關斬將能力缺乏, 可能又係一件高貨水貨...左閘和右中場質素一般,如果荷蘭將重心放係曼聯二寶身上,咁前景唔係咁樂觀, 總括而言,荷蘭已經唔係過往既強隊..

      相反,土耳其上半場既戰術非常有效,高位壓迫成功取得兩球領先, 下半場立刻轉打守勢波, 成班波既戰術執行力非常高,值得Win

      刪除
    2. 世界杯 衝唔到冠就搞成咁

      刪除
  10. 而家的轉會市場,已經唔單企買賣球員咁簡單...球員中介角色愈黎愈重,背後條數愈黎愈誇,球員轉會變相球員抄賣,好多球會靠買賣賺錢多過聯賽賺錢...睇下葡超由大到細的球會都係靠買賣球員...意大利西班牙中下游近年都係咁...仲有唔知大家有冇留意車仔...佢地團積左三十幾四十個後生仔........所以呢..而家D球會買賣球員唔係大家咁諗咁簡單

    回覆刪除
    回覆
    1. 葡超呢D非4大聯賽不嬲都係咁玩架
      唔止葡超荷蘭比利時呢D非主流聯賽都係咁
      球會無錢---->買入平價優質股---->踢到出左名有4大聯賽大球會出手-------->賣------>買入平價優質股.....LOOP年年如是十分正常
      至於車仔...作為一個球會...買入有前途既後生仔唔係好正常架咩??
      唔通個個好皇馬咁先叫健康

      刪除
  11. 有市場傳言指,電訊盈科(00008.HK)將會失去「英格蘭超級聯賽」直播權。消息指,LeTV(樂視)以超過4億美元(約31.2億港元)投得2016至2017球季起連續三季的英超香港直播權,比起nowTV上次以約2億美元(約15.6億港元)的價錢高出一倍。樂視發言人及電盈發言人均指,暫未有消息公布。(jw/u)~

    阿思達克財經新聞
    網址: www.aastocks.com

    回覆刪除
    回覆
    1. 唔想磅水比大陸公司

      刪除
    2. 但我好想買佢個部LETV, 有無師兄弟用過?

      刪除
  12. 港隊今晚會再創奇蹟嗎?!雖然無睇足球好耐也關心港足情況,期待有好成績啦。食住現時好氣勢一比零搏懞價啦,哈哈。

    回覆刪除
    回覆
    1. 無睇全場知道輸三追二滿意賽果,預祝港足更有香港精神。

      刪除
    2. 睇完場波,真係睇到好感動,
      感動並不是因為入返兩球咁簡單,
      而係場內熱氛,見到球迷既熱情,
      落後3球,仍一直打氣支持港隊,
      其實香港係有球迷既,
      為何政府一直莫視足球運動呢?
      只要係好波,就會有球迷入場,好似睇戲一樣,
      拍埋D垃圾片,當時無人睇,但有好戲上演,
      一樣可以收四、五千萬票房

      刪除
    3. 雖實力上有差距
      但輸人唔輸陣

      刪除
    4. 結果期實也反映Qatar並非如想像搬難取分,或許賽程安排,或許港隊能更早放手一搏,當然對手是有鬆懈,但也要港隊努力。

      尾段不只是搶回兩球得失球,也搶回了做球員的尊嚴,就如當日南華亞協4強的比賽一樣,大球場接近爆滿的敗仗而回,然而,卻贏得了小弟對本地足球多年的熱血期待,期待的就是港迷的團結。

      刪除